12.361 empresas da provincia recibiron máis de 1.500 millóns de euros en avais ICO

12.361 empresas da provincia recibiron máis de 1.500 millóns de euros en avais ICO

30/12/2020

Amais, 50.176 asalariados pontevedreses recibiron algún tipo de prestación social no último mes.

A subdelegada do Goberno en Pontevedra, Maica Larriba, presentou hoxe os últimos datos das diferentes liñas de axudas económicas e sociais implementadas polo Goberno na provincia. En relación aos avais ICO a empresas, a 30 de novembro en Pontevedra aprobáronse 19.496 operacións que afectan a un total de 12.361 entidades por un importe avalado de 1.510,6 millóns de euros –o que supón un 1,8 % do total nacional– e un financiamento global de 1.958,2 millóns.

En novembro, un total de 50.176 traballadores da provincia percibiron algún tipo de prestación social por parte do SEPE (ERTE, desemprego, etc.) por un importe total de 27,3 millóns de euros. Desde abril, o gasto acumulado en prestacións sociais supuxo 490,0 millóns de euros (dos cais 193,4 corresponden a ERTEs).

Na provincia, desde o inicio da pandemia e ata o 30 de setembro, o 87,7 % dos traballadores afectados por un ERTE incorporáranse xa ao mercado laboral. Non obstante, as novas restricións provocadas pola segunda onda da COVID-19 fixeron que o número de traballadores en ERTE a 30 de novembro se situara en 9.585 persoas.

Por último, en Pontevedra tramitáronse xa 13.326 expedientes do Ingreso Mínimo Vital, dos que 2.933 foron aprobados. Como consecuencia, en decembro 7.616 pontevedreses recibiron esta prestación (4.251 adultos e 3.365 menores).

Larriba quixo destacar que estes datos evidencian o compromiso deste Goberno cos colectivos máis vulnerables desde o inicio da pandemia. “O Executivo comprometeuse desde o primeiro momento coa protección dos traballadores, das empresas e dos máis desfavorecidos ante as consecuencias económicas derivadas desta crise sanitaria. Os case 500 millóns de euros que acumula a nómina de medidas de protección social na provincia así o avalan”, concluíu.