Isabel Rodríguez destaca o empeño do Goberno na modernización das infraestruturas da provincia

Imagen de la subdelegada del Gobierno

25/11/2020

 Adif protexerá a liña Monforte de Lemos-Lugo con máis de 29.000 metros de novos peches

 A subdelegada informa de que “para que Lugo non perda o tren, o Goberno está comprometido na mellora do treito Ourense-Monforte-Lugo, con actuacións previstas por importe de 515 millóns de euros”


A subdelegada do Goberno, Isabel Rodríguez, mostrou hoxe a súa satisfacción pola decisión de Adif de investir case 7 millóns de euros na execución dun proxecto para aumentar a seguridade do ferrocarril entre Monforte de Lemos e Lugo. Trátase dun proxecto para protexer a liña coa construción de máis de 29.000 metros de novos peches de protección, coa finalidade de evitar tránsitos indebidos polas vías.

 

Isabel Rodríguez manifestou que este novo investimento de Adif “demostra, con feitos, o empeño deste Goberno na modernización das infraestruturas da provincia de Lugo”.

 

“Para que Lugo non perda o tren, o Goberno está comprometido na mellora da treito Ourense-Monforte-Lugo, no que ten en marcha distintas actuacións de mellora con un investimento previsto aproximado de 515 millóns de euros”, destacou a subdelegada.

 

Rodríguez sinalou que Adif ten en marcha na nosa provincia numerosas actuacións destinadas á electrificación do treito Monforte-Lugo e á renovación da existente entre Monforte e Ourense, á renovación de vía e melloras en infraestruturas como pontes e túneles, á  mellora de instalacións de sinalización e telecomunicacións, á supresión de pasos a nivel e melloras de trazado ou á construción do novo túnel en Oural.

 

A subdelegada lembrou, ademais, que estes novos proxectos súmanse aos que xa están en execución, posto que desde 2018 Adif e Adif Alta Velocidade levan realizado investimentos por máis de 14,6 millóns de euros na nosa provincia. A metade deses cartos destináronse á mellora da conexión entre Monforte de Lemos e a capital da provincia, con 7,4 millóns de euros.