A provincia prepárase para a chegada de La Vuelta a España

A provincia prepárase para a chegada de La Vuelta a España

29/10/2020

A subdelegada do Goberno mantivo hoxe una reunión de coordinación cos representantes das Forzas e Corpos de Seguridade do Estado e dos Concellos polos que transcorrerán as dúas etapas pontevedresas do evento deportivo.

 

A subdelegada do Goberno en Pontevedra, Maica Larriba, reuniuse esta mañá cos responsables das Forzas e Corpos de Seguridade do Estado en Pontevedra e cos representantes dos diferentes Concellos polos que decorrerá La Vuelta ao seu paso pola provincia co obxectivo de coordinar un dispositivo de seguridade. Ao encontro acudiron o coronel xefe da Comandancia da Garda Civil en Pontevedra, Simón Venzal, o tenente do Subsector de Tráfico da Garda Civil na provincia, Juan José Díaz, e representantes municipais de O Porriño, Ponteareas, As Neves, Mos, Arbo, Lalín, Rodeiro e Agolada, as oito localidades polas que transcorrerán as etapas 14 e 15 deste evento deportivo.

A subdelegada explicou que “o obxectivo desta reunión non é outro que preparar un dispositivo provincial que permita reforzar a capacidade do propio operativo de seguridade co que xa conta La Vuelta a España”. Larriba advertiu que “dada a situación de pandemia que estamos vivindo, é moi importante fortalecer a colaboración de todas as forzas e corpos de seguridade, tanto estatais como locais, para poder garantir as medidas en vigor en materia de seguridade e sanidade, así como para organizar e preservar a seguranza das entradas, pasos e saídas dos deportistas en cada un dos concellos da provincia polos que decorre o campionato”.

Así mesmo, a subdelegada quixo solicitar a todos os afeccionados e afeccionadas da provincia que “fagan un seguimento do evento pola televisión, tal e como veñen demandando os propios organizadoras da proba ciclista. Estamos vivindo un momento crítico da pandemia e débense extremar as recomendacións sanitarias para evitar a propagación do virus; as concentracións de persoas son un risco innecesario”. Neste sentido, Larriba anunciou que “as forzas de seguridade coordinaranse para evitar aglomeracións nas rúas e vixiar que se cumpren as medidas sanitarias e de seguridade durante todo o percorrido da carreira”.